काठमाडौं। गत आर्थिक वर्षमा सञ्चालनमा रहेका १४ निर्जीवन बीमा कम्पनीहरूले कुल ५० अर्ब ६० करोड ३१ लाख रुपैयाँ बराबरको व्यवसाय गरेका छन् ।

गत आर्थिक वर्षमा निर्जीवन बीमा कम्पनीहरूको कुल बीमा शुल्क आर्जन १५.१२ प्रतिशतले बढेको हो । अघिल्लो आर्थिक वर्षसम्म निर्जीवन बीमा कम्पनीहरूले ४३ अर्ब ९५ करोड ८७ लाख रुपैयाँमात्रको व्यवसाय गरेका थिए ।

गत आर्थिक वर्षमा सबैभन्दा धेरै व्यवसाय गर्ने कम्पनी शिखर इन्स्योरेन्स कम्पनी रहेको छ । यस कम्पनीले गत आर्थिक वर्षमा ६ अर्ब ५१ करोड १२ लाख रुपैयाँ बराबरको बीमा व्यवसाय गरेको छ । कम्पनीको व्यवसाय अघिल्लो आर्थिक वर्षको सोही अवधिको तुलनामा १२.३८ प्रतिशतले वृद्धि भएको छ ।

त्यस्तै दोस्रो नम्बरमा रहेको सगरमाथा लुम्बिनी इन्स्योरेन्सको बीमा व्यवसाय ८.४० प्रतिशतले बढेर ५ अर्ब ४२ करोड २२ लाख रुपैयाँ पुगेको छ । हिमालयन एभरेष्ट र एनएलजी इन्स्योरेन्सको व्यवसाय सर्वाधिक वृद्धि भएको छ । हिमालयनको व्यवसाय ३१ प्रतिशतले बढेर ५ अर्ब ३७ करोड र एनएलजीको ३७ प्रतिशतले बढेर ४ अर्ब २० करोड रुपैयाँ पुगेको छ ।

यता, क्रमशः सिद्धार्थ प्रिमियरको कुल बीमा शुल्क आर्जन ०.१७ प्रतिशतले बढेर ४ अर्ब ३१ करोड, नेको इन्स्योरेन्सको ११.३७ प्रतिशतले बढेर ३ अर्ब ६५ करोड, , द ओरियन्टलको २० प्रतिशतले बढेर ३ अर्ब २५ करोड, युनाइटेड अजोडको ११.९५ प्रतिशतले बढेर ३ अर्ब ११ करोड, नेपाल इन्स्योरेन्सको ८.७७ प्रतिशतले बढेर २ अर्ब २१ करोड र प्रभु इन्स्योरेन्सको ८.२१ प्रतिशतले बढेर २ अर्ब २ करोड रुपैयाँ पुगेको छ ।

सबैभन्दा कम राष्ट्रिय बीमा कम्पनी र नेशनल इन्स्योरेन्सले व्यवसाय गरेको छन् । वर्षदिनको अवधिमा राष्ट्रिय बीमा कम्पनीले १ अर्ब ५८ करोड र नेशनल इन्स्योरेन्सले १ अर्ब २९ करोड कुल बीमा शुल्क आर्जन गरेका हुन् ।