काठमाडौं । लक्ष्मीपूजाको दिन नेपालमा विद्युतको आन्तरिक उच्चतम माग १ हजार ८१३ मेगावाट पुगेको छ। आन्तरिक माग पूरा गरेर नेपालले ५८७.३० मेगावाट विद्युत् निर्यात गरेको छ।

नेपाल विद्युत् प्राधिकरणको तथ्याङ्कअनुसार २०८३ कात्तिक २२ गते साँझ ६ बजेर १५ मिनेटमा राष्ट्रिय विद्युत् प्रणालीको उच्चतम माग १ हजार ८१३ मेगावाट पुगेको हो। उक्त समयमा प्रणालीमा कुल २ हजार ४००.३० मेगावाट विद्युत् उत्पादन भएको थियो।

उत्पादित विद्युत्मध्ये ५८७.३० मेगावाट निर्यात गरिएको प्राधिकरणको तथ्याङ्कमा उल्लेख छ। यसले आन्तरिक माग पूरा गरेपछि पनि नेपालमा उत्पादित विद्युत् निर्यातयोग्य अवस्थामा रहेको देखाउँछ।

उक्त दिन निजी क्षेत्रका विद्युत् आयोजनाबाट सबैभन्दा धेरै १ हजार ५३६.५० मेगावाट विद्युत् उत्पादन भएको थियो। त्यस्तै, नेपाल विद्युत् प्राधिकरणका सहायक कम्पनीबाट ४९९.२० मेगावाट, नदी प्रवाहमा आधारित तथा अर्धजलाशययुक्त आयोजनाबाट ३४२.३० मेगावाट र जलाशययुक्त आयोजनाबाट २२.३० मेगावाट विद्युत् उत्पादन भएको थियो।

तीन वर्षको विद्युत् प्रणालीको तुलना

त्यस दिन तापीय ऊर्जा र विद्युत् आयात शून्य रहेको तथ्याङ्कले देखाएको छ। साथै, विद्युत् अवरोधसमेत शून्य मेगावाट रहेको थियो।

लक्ष्मीपूजाको समयमा काठमाडौं उपत्यकाको अधिकतम विद्युत् माग करिब ४८९.५० मेगावाट पुगेको थियो। प्रणालीको आवृत्ति ५०.१२० हर्ज कायम रहेको प्राधिकरणको विवरणमा उल्लेख छ।

लक्ष्मीपूजाको दिनको विद्युत् उत्पादन र मागको विवरणले नेपालको विद्युत् प्रणालीमा उत्पादन क्षमता विस्तारसँगै आन्तरिक माग पूरा गरेर ठूलो परिमाणमा विद्युत् निर्यात गर्न सक्ने अवस्था बनेको देखाएको छ।