झापा । पूर्वीनाका काँकडभिट्टाबाट विद्युतीय रिक्सा (ई–रिक्सा)को आयात बर्सेनि बढिरहँदा परम्परागत पाइडल रिक्सा लोप भएका छन् । पाँच वर्षमा ८९ करोड ४३ लाख ३६ हजार १ सय ६१ रुपैयाँ मूल्य बराबरको १० हजार १ सय ६४ वटा ई–रिक्सा आयात भएको मेची भन्सार कार्यालय काँकडभिट्टाका सूचना अधिकारी गणपति कँडेलले बताए।

उनका अनुसार आर्थिक वर्ष २०८०/८१ मा ४१ करोड २० लाख ३९ हजार ९ सय ५९ रुपैयाँ मूल्य बराबरको चार हजार ६ सय ४५ ई–रिक्सा पूर्वीनाकाबाट भित्रिएको छ । यसअघिको आव २०७९/८० को तुलनामा उक्त आयात दोब्बरभन्दा बढी हो ।

आव २०७९/८० मा १६ करोड ७१ लाख १९ हजार दुईसय १३ रुपैयाँ मूल्य बराबरको एक हजार ८५९ ई–रिक्सा आयात भएको थियो । ई–रिक्साको आयात महसुल वापत मेची भन्सार कार्यालयले बिगत पाँच वर्षमा ३१ करोड ३७ लाख ३ सय २९ रुपैयाँ राजस्व असुली गरेको भन्सारले जनाएको छ ।

आव २०७६/७७ मा यही नाकाबाट आठ करोड ८१ लाख ५१ हजार ८४० रुपैयाँ मूल्य बराबरको एक हजार ३२ वटा ई–रिक्सा आयात भएको थियो भने आव २०७७/७८ मा आठ करोड ७२ लाख सात हजार ९ सय ९९ रुपैयाँ मूल्य बराबरको एक हजार १ सय १५ आयात भएको थियो ।

तथ्यांकले ई–रिक्साको आयात वर्षेनी निरन्तर बढेको देखाउँछ । आव २०७८/७९ मा १३ करोड ९८ लाख १७ हजार १ सय ५० रुपैयाँ मूल्य बराबरको एक हजार ५ सय १३ वटा ई–रिक्सा काँकडभिट्टास्थित भन्सार भएर आयात भएको थियो ।

विगत पाँच वर्षयता झापाको सहर बजारमा विद्युतीय रिक्साले छोटो दूरीको सवारीमा एकछत्र सेवा पुर्याउँदै आएको छ । विद्युतीय रिक्सा भित्रिएपछि परम्परागत पाइडल रिक्सा लोप भइसकेका छन् । विद्युतीय रिक्सा व्याट्रीबाट चल्ने हुँदा यसलाई घरमै रिचार्ज गरेर चलाउन सकिन्छ भने चालकलाई यसले थप सुविधाजनक तुल्याएको छ ।

बिगतमा परम्परागत रिक्सा चलाउनेहरुले अहिले ई–रिक्सा खरिद गरेर गुजारा चलाउन थालिसकेका छन् । यसैबीच, पूर्वीनाका काँकडभिट्टा हुँदै बिगत पाँच वर्षमा दुई करोड ४० लाख १३ हजार २ सय ४७ रुपैयाँ मूल्य बराबरको १ सय ४५ वटा तीन पांग्रे स्कुटर भन्सार महसुल छुटमा आयात भएको छ।

मेची भन्सार कार्यालयबाट प्राप्त तथ्यांक अनुसार फरक क्षमता भएका शारीरिक अशक्त व्यक्तिहरुले प्रयोग गर्ने तीनपांग्रे स्कुटर भन्सार छुटमा आयात गर्दा प्रज्ञापन पत्र वापत पाँच सय र मूल्य अभिवृद्धि करवापत ६५ रुपैयाँमात्र महसुल बुझाउनुपर्छ ।