काठमाडौं । कोरियन कम्पनी ‘अल्ट डट ओएक्स’ ले हाई अल्टिच्युडमा प्रयोग गर्न सकिने अक्सिजन जेनेरेटिङ मास्क नेपाली बजारमा भित्र्याएको छ ।

काठमाडौंको ठमेलमा कोरिया टुर एण्ड ट्रेकिङ अपरेटर एसोसिएसन अफ नेपाल ‘KTTOAN’ को सहयोगमा एक कार्यक्रमको आयोजना गर्दै उक्त मास्कको बारेमा कम्पनीले जानकारी गराएको हो ।

विशेष गरेर २५०० मिटरभन्दा माथिको उचाइको ट्रेकिङमा मास्कको उच्च महत्त्व रहने पनि कम्पनीका सिईओ ग्वाङहो हा (GWANGHO HA) ले जानकारी दिए । अक्सिजनका ठूला–ठूला सिलिन्डर बोक्ने झन्झटबाट यस मास्कले थोरै भए पनि सहजता प्रदान गर्ने कम्पनीले जनाएको छ । जम्मा ४२ ग्रामको प्याकेटमा एक घण्टासम्म अक्सिजन लिन सकिनेसरि तयार गरिएको यो मास्क कोरियन सरकारबाट मान्यता प्राप्त रहेको पनि कम्पनीको दाबी रहेको छ।

दुई वर्षदेखि मास्कको उत्पादन तथा वितरण भइरहेको र जापान, फिलिपिन्स, भियतनामपछि नेपालमा मास्कको बिक्री वितरणका लागि काम भइरहेको पनि कम्पनीको भनाइ छ । पर्यटकका लागि नेपाल उत्कृष्ट गन्तव्य रहेको र यहाँ २५ सय मिटरभन्दा अग्ला स्थानहरूमा पर्यटकहरूको आवतजावत बाक्लो हुने हुनाले पनि अक्सिजन जेनेरेटिङ मास्कलाई प्राथमिकतामा राखिएको कम्पनीले जनाएको छ ।

कम्पनीले तयार गरेको मास्क खोलेर प्रयोग गर्नसाथ स्वतः अक्सिजन उत्पादन हुने र श्वासप्रश्वासमा सहजता प्रदान गर्ने छ। जसका लागि प्रयोग कर्ताले मास्कको प्याक खोलेर त्यस भित्र रहेका दायाँ र बायाँ दुवैवटा प्लास्टिकको सिल खोल्नुपर्ने छ ।बाँकी अन्य प्रयोगमा रहेका मास्क जस्तै प्रयोग गरे पुग्ने छ । कम्पनीले मास्क तयार गर्दा महिला, पुरुष तथा बालबालिका सबैलाई मिल्ने गरी डिजाइन गरेको पनि जनाएको छ ।

नेपालमा मास्कको नयाँ प्रडक्ट लन्च गर्नु अघि सगरमाथा आधार शिविर लगायतका क्षेत्रमा यसको परीक्षण सफल भइसकेको तथा आगलागी र अन्य विगतजन्य घटनामा पनि यसको सफल परीक्षण भइसकेको कम्पनीले जनाएको छ । उक्त मास्कको ब्रान्ड एम्बेसडरमा किम मिगोन रहेको र उनी ८००० मिटर माथिका १४ वटै हिमाल आरोहि हुन् भने कोरियाको छैटौं पर्वतारोहीसमेत हुन्।

मास्क सार्वजनिक भएसँगै ट्रेकिङ क्याम्प नेपालको प्रबन्ध निर्देशक वाङचु शेर्पाको नेतृत्वमा नेपालमा यसको बिक्रीवितरण हुने छ।