नेपालगञ्ज । जिल्लामा भूमि समस्या समाधान आयोगको कार्यालय स्थापना गरिएको छ । अयोगको नवनियुक्त अध्यक्ष घननाथ खनालले कार्यालय स्थापनापछि जिल्ला समन्वय समितिमा कार्यभारसमेत सम्हालेका छन् ।

अध्यक्ष खनालले जिल्लामा विद्यमान भूमिसम्बन्धी समस्या समाधानमा गम्भीरतापूर्वक लाग्ने उल्लेख गर्दै पालिकाबाट अहिलेसम्म ४४ हजार ५ सय २३ भूमिसम्बन्धी समस्या आएकाले ती समस्याको अध्ययन गरी समाधानका उपाय खोजिने बताए । उनले भने, ‘यसको विस्तृत अध्ययन गरेपछि सङ्ख्या बढ्न पनि सक्छ, त्यसपछि पुर्जाका लागि आयोगले सिफारिस गर्न सक्छ ।’ समस्या पहिचान र समाधान प्रक्रियामा सबैको साथ र सहकार्य जरुरी रहेकामा जोड दिँदै उनले नयाँ नापजाँचको काम केही महिनापछि सुरु हुने जानकारी दिए ।

अध्यक्ष खानलले यही फागुन ७ गतेदेखि सबै स्थानीय तहका वडामा कर्मचारी पुग्ने जानकारी दिँदै कर्मचारी व्यवस्थापनको काम पनि दु्त गतिमा अघि बढाइएको बताए।

कार्यक्रममा सङ्घीय सांसदहरू सूर्य ढकाल, दिपा शर्मा, लुम्बिनी प्रदेशसभाका सांसद बादशाह कुर्मी, नेपालगञ्ज उपमहानगरपालिकाका प्रमुख प्रशान्त विष्ट, कोहलपुर नगरपालिकाका प्रमुख पूर्णप्रसाद आचार्य, राप्तीसोनारी गाउँपालिकाका अध्यक्ष तप्तबहादुर पौडेल, वैजनाथका अध्यक्ष प्रकाशबहादुर शाही, खजुराका अध्यक्ष डम्बरबहादुर विक, नरैनापुरका अध्यक्ष इश्तियाक अहमद शाह, जानकीका अध्यक्ष छब्बन खाँ, डुडुवा उपाध्यक्ष शाहिदा बानो, कांग्रेस बाँकेका सभापति नारायणप्रसाद गौडेल, एमालेका जिल्ला अध्यक्ष निरक गुरुङ, नेकपा माओवादीका जिल्ला अध्यक्ष नरेन्द्रप्रसाद पाण्डे, प्रमुख जिल्ला अधिकारी खगेन्द्रप्रसाद रिजाललगायत व्यक्तिले भूमिहीन दलित, भूमिहीन सुकुम्बासी र अव्यवस्थित बसोबासीलाई व्यवस्थित गर्ने गरी काम गर्नुपर्नेमा जोड दिएका थिए।