काठमाडौं ।  चैत २५ गतेदेखि  जलविद्युत लगानी तथा विकास कम्पनी (एचआइडीसीएल) ले कुल १ करोड ७८ लाख ४० हजार १४० कित्ता सेयर लिलामी गर्ने भएको छ । 

उक्त कम्पनीले संस्थापक समूहको सेयर लिलामीमा बिक्री गर्न लागेको हो । लिलामीमा जो कोही व्यक्ति, संस्था वा कम्पनीले आवेदन दिन सक्ने एचआइडीसीएलले जनाएको छ । यसमा वैशाख ९ गतेसम्म लिलामीको बोलपत्र पेस गर्न सकिनेछ । 

न्यूनतम १ सय रुपैयाँलाई आधार मानेर लिलाम बढाबढमा सहभागी बन्नुपर्नेछ । यसमा बिक्री प्रबन्धक ग्लोबल आइएमई क्यापिटल नक्साल, काठमाडौं तथा ग्लोबल आइएमई बैंकको शंखमूल नयाँबानेश्वर काठमाडौंबाट बोलपत्र आवेदन फारम लिन र बुझाउन सकिने कम्पनीले जनाएको छ । यसमा न्यूनतम १०० कित्ताका लागि आवेदन दिनुपर्नेछ । 

यसैगरी, ग्लोबल आइएमई बैंकको विर्तामोड, विराटनगर, जनकपुर, वीरगञ्ज, हेटौंडा र नारायणगढ शाखाबाट आवेदन दिन सकिन्छ । साथै, बैंकको पोखरा, बुटवल, बागलुङ, नेपालगञ्ज, सुर्खेत, घोराही, धनगढी र महेन्द्रनगर शाखाबाट पनि लिलामी भर्न सकिने व्यवस्था छ ।