स्याङ्जा । जिल्ला प्रहरी कार्यालय स्याङ्जाले विभिन्न मुद्दाका फरार कसुरदारलाई पक्राउ गरेको छ । प्रहरीले बिहीबार एकै दिन विभिन्न मुद्दाका आठ कसुरदारलाई पक्राउ गरेको हो ।

जिल्ला अदालतबाट विभिन्न मितिमा मुद्दा फैसला भई कैद तथा जरिवाना भुक्तान गर्न बाँकी रहेका ८ जनालाई एकै दिन पक्राउ गरेको जिल्ला प्रहरी कार्यालयका सूचना अधिकारी प्रसन्नराज चौधरीले जानकारी दिए । पक्राउ परेका आठ जनामध्ये बैंकिङ कसुरका चार, चेक अनादर तीन र कुटपिट एकजना रहेका छन् ।

पक्राउ परेका ८ जना कसुरदारको २४ दिन कैद भुक्तान बाँकी रहेको छभने एक करोड ६१ लाख आठ हजार ४ सय ४२ रुपैयाँ जरिवाना असुल गर्न बाँकी रहेको उनले जानकारी दिए । बैंकिङ कसुरमा पक्राउ पर्नेमा भीमबहादुर विश्वकर्माको २३ दिन कैद भुक्तान र ८० लाख रुपैयाँ जरिवाना रहेको छ ।

त्यसैगरी बैंकिङ कसुरमै कमला केसीको ७९ लाख ८८ हजार रुपेययाँ, बैंकिङ कसुरमै बत्ती विकको एक लाख रुपैयाँ र एक दिन कैद भुक्तान, बैङ्किङ कसुरमै शिवलाल लम्सालको १६ हजार ७५० रुपैयाँ, चेक अनादरमा झवनाथ भण्डारीको दुई हजार, चेक अनादरमै अमराज गुरुङको एक हजार रुपैयाँ, चेक अनादरमै गङ्गामाया गुरुङसेनीको ५ सय ८२ रुपैयाँ असुली गर्न बाँकी रहेको छ ।

त्यसैगरी कुटपिटमा ढालबहादुर सुनारको ११० रुपैयाँ असुली हुन बाँकी रहेको सूचना अधिकारी चौधरीले बताउनुभयो । जिल्ला अदालतबाट भएको फैसला कार्यान्वयनलाई चुस्त, दुरुस्त र प्रभावकारी बनाउने कार्यका लागि जिल्लाबाट प्रहरी खटिएर पक्राउ गरेको हो । न्यायिक कारबाहीलाई पूर्णता दिँदै सुरक्षित र न्यायपूर्ण समाज निर्माणको सुनिश्चिततामा जोड दिएको उनले बताए ।

जिल्ला अदालतले विभिन्न मितिमा फैसला गरेको मुद्दापश्चात् फरार रहेका कसुरदारलाई प्रहरीले पक्राउ गरी जिल्ला अदालतमा जरिवाना तथा कैद भुक्तानका लागि उपस्थित गराएको उनले जानकारी दिए।