काठमाडौं । नेकपा एमालेका सांसद तथा पूर्वमन्त्री भगबती चौधरीले स्वदेशमै व्यवसाय गर्ने वातावरण सिर्जना गर्नुपर्नेमा जोड दिएकी छिन् ।

अर्थ समितिमा बसेको बैठकमा उनले त्यस्तो आग्रह गरिन् । उनले आर्थिक विधेयक मार्फत सुन, चाँदी र गरगहनामा लगाइएको करका सम्बन्धमा नेपाल सुनचाँदी व्यवसायी महासंघले दिएको निवेदन र बैंक तथा वित्तीय संस्था सम्बन्धी ऐन, २०७३ लाई संशोधन गर्न बनेको विधेयकको सम्बन्धमा आन्तरिक छलफल भएको हो ।

त्यस अवसरमा पूर्वमन्त्री चौधरीले व्यवसायी लगानीकर्तामाथि धेरै कडाइ गर्न नहुने बताइन् । अवैधानिक रूपमा व्यापार व्यवसाय गर्नेहरूमाथि मात्रै निगरानी बढाएर करको दायरामा ल्याउन जरुरी रहेको उनको भनाई थियो । उनले डायमन्डमा लगाइएको विलासिता कर हटाउनुपर्ने बताइन् ।

‘यदि व्यवसायी लगानीकर्ता सबैलाई फस्टाउनु छ भने यसै टाइट गर्ने हो भने झनै समस्या आउँछ । अहिलेको अवस्था त यति नैराश्यता छ । हाम्रो मार्केट, अर्थतन्त्र यति तल झरिसकेको छ’, उनले भनिन्, ‘यो तरिकाले झनै तल खस्किन्छ । डायमन्डमा लग्जरी कर जुन छ त्यसलाई हटाउनुपर्छ । आम उपभोक्ताले बढी प्रयोग गर्ने चिजमा कर बढाइदिए मारमा उनीहरू नै पर्दछन् । हामी उद्योगधन्दा फस्टाउन चाहन्छौँ, यहीँ व्यवसाय गर्न दिने हो भने टाइट नगरौँ ।’

आम उपभोक्ताले बढी प्रयोग गर्ने चिजमा कर वृद्धि गरे उपभोक्ता मारमा पर्ने उनको भनाई थियो ।