काठमाडौं । नवलपरासी जिल्लाको गैंडाकोट–८ मा मुख्य कार्यालय रहेको किसान बचत तथा ऋण सहकारी संस्था ३० वर्ष पुरा गरी ३१औं वर्ष प्रवेश गरेको छ ।

२०५२ असार १५ गते स्थानीय २५ जनाको सक्रियतामा स्थापित संस्था हालसम्म २५ वटा सहकारी संस्थाबीच एकीकरण गरिसकेको छ । संस्थाले नाफा भन्दा सदस्य र समुदायलाई केन्द्रित सेवा दिँदै आएको छ ।

स्थापना दिवसको अवसरमा १३ गते कावासोती स्थित ज्ञानोदय मावि र गैंडाकोट स्थित जनक नमुना माविमा अध्ययनरत विद्यार्थीहरुलाई ट्राफिक सचेतना कार्यक्रम गरेको छ । संस्थाले जनक नमुना मावि परिसर आसपासका सडकमा जेब्राक्रस समेत बनाएको छ ।

सहकारीका सेवा केन्द्र रहेका विभिन्न दुई दर्जन स्थानका विभिन्न सार्वजनिक स्थलको सरसफाई सम्पन्न गरेको छ । संस्थाका सञ्चालक, कर्मचारी, उपसमिति र स्थानीयबासी सदस्यहरुको उपस्थितिमा कार्यक्रम सम्पन्न भएको संस्थाका प्रमुख कार्यकारी अधिकृत सन्जयराज तिमिल्सीनाले बताए ।

‘सप्ताहव्यापी स्थापना दिवस कार्यक्रम अन्तरगत आज असार १४ गते कार्यक्षेत्र भित्रका विभिन्न २१ वटा सार्वजनिक स्थलहरुको सरसफाई कार्यक्रम सम्पन्न गरिएको छ’ उनले भने, ‘बिहान ७ः३० बजे सबै सेवाकेन्द्रहरुबाट एकै साथ सुरुभएको उक्त कार्यक्रमले सार्वजनिक स्थलहरु सफाई गर्नुका साथै सरसफाईमा सामाजिक सचेतना वृद्धि गर्ने विश्वास लिएका छौं ।’

संस्थाले सरसफाई अभियान अन्तर्गत तनहुँ जिल्ला अन्तर्गत देवघाट गाउँपालिका, देवघाट स्थित देउपुर पार्क, चितवन जिल्ला अन्तर्गत नारायणघाट, पुल्चोकको हरिहर मन्दिर, भरतपुर स्थित दुर्गा मन्दिर, समृद्धि सेवा केन्द्र क्षेत्रमा रहेको विश्राम स्थल र चौतारी, रत्ननगर नगरपालिका, टाँडी क्षेत्रको सिद्धेश्वर जलदेवी मन्दिर रहेका छन् ।

त्यसैगरी नवलपुर जिल्ला अन्तर्गत दुम्कीबास क्षेत्रको कालिका मन्दिर, सर्दिको शिवालय मन्दिर, अरुणखोलाको गणेश मन्दिर र शिव मन्दिर, अमरापुरी क्षेत्रको शमशान घाट, हर्कपुर क्षेत्रको दुर्गा मन्दिर, मुकुन्दपुर क्षेत्रको बसुन्धरा मन्दिर, देवचुली क्षेत्रको घुमाउने सामुदायिक वनको पार्क र विहार, दलदले क्षेत्रको गणेश मन्दिर, रजहर क्षेत्रको शिवालय मन्दिर, चोरमारा क्षेत्रको दुर्गा मन्दिर, गोछाडा क्षेत्रको कुमारवर्ती स्वास्थ्य चौकी, गैंडाकोट पुल्चोक क्षेत्रको एसियन राजमार्ग, शिलान्यास पार्क र शिलान्यास चोक, गैंडाकोट क्षेत्रकै रानीताल चण्डीका मन्दिर र कावासोती, विष्णुनगर क्षेत्रको राम मन्दिररहेका छन् ।

स्थापना दिवसको दिन असार १५मा राष्ट्रिय धान दिवसमा पञ्चवटि सेवाकेन्द्र क्षेत्रका कृषकका १० कठ्ठा धानखेतमा सामुहिक धान रोपाईं कार्यक्रम सम्पन्न गरिएको छ। यस्तै ५१ जना विद्यार्थीहरुलाई शैक्षिक सामाग्री वितरण गरिएको छ ।

विभिन्न २५ वटा संस्था जोडिएर किसान साकोस बनेको हुनाले सबै संस्थाको स्थापनाकाल देखि एकीकरण पूर्वका सम्पूर्ण नेतृत्वहरुसँग साक्षात्कार गर्दै मार्गदर्शन प्राप्त गरेको छ ।

सदस्य सेवा नै हाम्रो मुख्य उद्देश्य हो” संस्थाका अध्यक्ष भोजराज पौडेलले भने । संस्थाले संस्था स्थापनाकालदेखि हालसम्मको अवस्था र परिवेशका साथै अनुभव आदान-प्रदानबाट संस्थाको साझा स्वामित्व सदस्यतहमा अनुभुति गराउने प्रयास गरेको हो । संस्था ठुलो हुँदै गर्दा सदस्य र नेतृत्वका बिचमा सामिप्यता कमजोर हुन नदिन निरन्तर नेतृत्व विकासका साथै पूर्व नेतृत्वकर्ताको अनुभव ग्रहण गर्दै अगाडि बढ्नेमा संस्थाले जोड दिएको छ ।

किसान साकोसले आफनो गौरवमय ३० वर्ष सफलतापूर्वक पुरा गरि ३१औं वर्ष प्रवेश गर्न गईरहेको यस गौरवमय ईतिहास सहितको दर्विलो वर्तमान र उज्जवल भविष्यका लागि ‘समृद्ध सदस्य, दिगो साकोस’ भन्ने परिकल्पना सहित ४ अर्बको कुल सम्पत्ति, राष्ट्रिय–अन्तर्राष्ट्रिय सम्मान प्राप्त गरेको संस्थाले सहकारी क्षेत्रमा उदाहरणीय कार्य गर्दै आएको छ ।