काठमाडौं । नेपालको डिजिटल इकोसिस्टमलाई तीव्रताका साथ अगाडि बढाउने ऐतिहासिक कदम चाल्दै कम्प्युटर एशोसिएशन नेपाल महासंघ (क्यान महासंघ) र सुदूरपश्चिम विश्वविद्यालयबाट सम्बन्धीत महर्षि कलेजबीच ५ वर्षको रणनीतिक समझदारी पत्रमा हस्ताक्षर भएको छ।

यस सहकार्यको मुख्य उद्देश्य कृत्रिम बौद्धिकता र भविष्यका लागि आवश्यक प्रविधि सीपहरू नेपालका सातै प्रदेशका युवा नेपालीहरूका माझ पुर्‍याउनु रहेको छ ।

काठमाडौंमा आयोजित एक कार्यक्रममा क्यान महासंघका कार्यवाहक अध्यक्ष तथा वान कवर प्रा.लि. का संस्थापक सीईओ चिरञ्जीबी अधिकारी र महर्षि कलेजका प्रिन्सिपल श्री रामराज आचार्य ले संयुक्त रूपमा यस समझदारी पत्रमा हस्ताक्षर गरे ।

“यो साझेदारी भनेको अवरोधहरू पन्छाएर हाम्रा युवाहरूको वास्तविक सम्भावनालाई बाहिर ल्याउनु हो,” क्यान महासंघका कार्यवाहक अध्यक्ष अधिकारीले भने” हामी चाहन्छौं कि युवा नेपालीहरूले एआईको प्रयोग मात्र नगरून् उनीहरू आफैं यसको निर्माण गरून्, यसलाई आकार दिऊन् र विश्वव्यापी डिजिटल क्रान्तिको नेतृत्व गरून्। सातै प्रदेशमा यी बुटक्याम्प र स्टार्टअप कार्यक्रमहरू पुर्‍याएर हामी यो सुनिश्चित गर्दैछौं कि नेपालका प्रत्येक युवा दूरदर्शीले राष्ट्रिय अवसरमा आफ्नो स्थान पाऊन्।”

शैक्षिक ढाँचाहरूलाई व्यावहारिक उद्योग अनुभवसँग मिलाएर, हामी विद्यार्थीहरूका लागि प्रविधि क्षेत्रमा प्रवेश गर्ने प्रत्यक्ष मार्ग तयार गर्ने महर्षि कलेजका प्रिन्सिपल रामराज आचार्यले बताए ।
भोलिका चुनौतीहरूको सामना गर्न तयार दक्ष र प्रविधि-मैत्री जनशक्ति तयार पार्ने दिशामा यो एक साहसी कदम भएको उनको भनाइ छ ।