काठमाडौं । राष्ट्रिय स्वतन्त्र पार्टी (रास्वपा) की सांसद निशा डाँगीले विराटनगरमा रहेको जुट मिल पुनः सञ्चालन गर्ने सरकारको पहल सकारात्मक भएको बताएकी छन् । मंगलबार बसेको प्रतिनिधिसभा बैठकमा बोल्दै उनले बन्द रहेका उद्योग सञ्चालनमा ल्याउनेसँगै सञ्चालनमा रहेका उद्योगलाई कसरी टिकाउने भन्ने विषयमा पनि सरकारले ध्यान दिनुपर्ने बताइन् ।
भारतले नेपाली जुटजन्य वस्तुमा लगाएको ‘एन्टी डम्पिङ ड्युटी’ वृद्धि तथा ‘काउन्टरभेलिङ ड्युटी’सम्बन्धी अनुसन्धानका कारण नेपाली जुट उद्योग प्रभावित बन्दै गएको उनले बताइन् । उद्योग बन्द हुँदा हजारौँले रोजगारी गुमाउनुपरेको र किसानले उत्पादन गरेको जुट बाटोमै फाल्नुपर्ने अवस्था सिर्जना भएको उनको भनाइ थियो ।
नेपाली जुट उद्योगको संरक्षणका लागि भारतसँग आवश्यक कूटनीतिक पहल गर्नुपर्नेमा उनले जोड दिइन् । साथै, औद्योगिक व्यवसाय ऐन, २०७६ बमोजिम रुग्ण उद्योग पुनरुत्थानको प्रक्रिया अघि बढाउन पनि उनले सरकारको ध्यानाकर्षण गराइन् ।
“सरकारले बन्द रहेका उद्योग खोल्ने नीतिमात्रै होइन, खुलेका उद्योग टिकाउने नीतिबारे पनि काम गर्न आवश्यक छ,” सांसद डाँगीले भनिन्।
प्रतिक्रिया दिनुहोस्