काठमाडौं । हिमालयन बुलियन कम्पनीले किस्ताबन्दीमा वास्तविक चाँदी खरिद गर्न सकिने मोबाइल एप ‘एचबीसी एप’ सार्वजनिक गरेको छ । एपमार्फत ग्राहकले आफूलाई अनुकूल हुने रकम र समयमा भुक्तानी गर्दै चाँदीका सिक्का तथा बार खरिद गर्न सक्ने कम्पनीले जनाएको छ ।

सन् २००० मा स्थापना भएको कम्पनीले एन्ड्रोइड र आईओएस दुवै प्रयोगकर्ताका लागि एप उपलब्ध गराएको हो । कम्पनीका अनुसार ग्राहकले एपमा खाता खोलेर ग्राहक पहिचान प्रक्रिया पूरा गरेपछि चाँदीको दैनिक मूल्य हेर्न र खरिदको लक्ष्य निर्धारण गर्न सक्नेछन् । १०, २०, ५० र १०० ग्रामका सिक्का तथा ५०० ग्राम वा सोभन्दा बढी तौलका चाँदीका बार खरिद गर्न सकिनेछ । खरिदका लागि कनेक्टआईपीएस वा एचबीसीको विद्युतीय खातामार्फत भुक्तानी गर्न सकिने व्यवस्था गरिएको छ।

एपमा खाता खोल्ने प्रक्रिया सरल बनाइएको कम्पनीले जनाएको छ। यद्यपि, पहिलोपटक चाँदी खरिद गर्दा नेपाल राष्ट्र बैंक तथा सम्पत्ति शुद्धीकरण निवारणसम्बन्धी प्रचलित व्यवस्थाअनुसार स्थायी लेखा नम्बर (प्यान) र तस्बिरसहितको ग्राहक पहिचान विवरण प्रमाणित गर्नुपर्ने छ।

एपमार्फत खरिद गरिएको चाँदीको भुक्तानी पूरा नहुँदासम्म बिमा गरिएको सुरक्षित भण्डारण कक्षमा राखिने कम्पनीले जनाएको छ। खरिदकर्ताले आफूले किनेको चाँदी आवश्यक परेको समयमा पूर्वनिर्धारित समय मिलाएर बुझिलिन सक्ने छन्।

यस एपको अर्को विशेषता आफ्नो लगानीको अवस्था मोबाइलबाटै हेर्न सकिने सुविधा हो। प्रयोगकर्ताले आफूसँग रहेको चाँदीको परिमाण र त्यसको हालको बजार मूल्य हेर्न सक्नेछन्। यसले चाँदीको मूल्यमा हुने परिवर्तनअनुसार आफ्नो लगानीको अवस्थाबारे जानकारी लिन सहज बनाउने कम्पनीको विश्वास छ।

परम्परागत रुपमा भौतिक चाँदी खरिद गर्दा बजारमा पुगेर कारोबार गर्नुपर्ने अवस्थालाई डिजिटल माध्यमबाट सहज बनाउने उद्देश्यले एप ल्याइएको कम्पनीले जनाएको छ। मोबाइलबाटै खरिद तथा लगानीको विवरण हेर्न सकिने सुविधाले चाँदीमा लगानी गर्न चाहनेलाई कारोबार व्यवस्थापन गर्न थप सहज हुने अपेक्षा गरिएको छ।

‘एचबीसी सिल्भर’ एप एन्ड्रोइड र एप्पलका आईफोन दुवैमा उपलब्ध छ। एप तथा खाता सञ्चालनसम्बन्धी थप जानकारीका लागि हिमालयन बुलियनको कार्यालय वा ग्राहक सेवा केन्द्रमा सम्पर्क गर्न सकिने कम्पनीले जनाएको छ।

एचबीसी एप कसरी काम गर्छ?

१, खाता खोल्ने र केवासी पूरा गर्ने

ग्राहकहरूले एपमा दर्ता गरी आवश्यक ग्राहक पहिचान प्रक्रिया पूरा गर्नुपर्ने छ।

२, चाँदीको मूल्य हेर्ने

एपको मुख्य स्क्रिनमा दैनिक चाँदीको खरिद मूल्य तथा एचबीसीले पुनः खरिद गर्ने दर हेर्न सकिन्छ।

३, आफ्नो लक्ष्य छनोट गर्ने

ग्राहकहरूले १० ग्राम, २० ग्राम, ५० ग्राम वा १०० ग्रामका चाँदीका सिक्का तथा ५०० ग्राम वा सोभन्दा माथिका चाँदीका बार छनोट गर्न सक्ने छन्।

एकैपटक अधिकतम तीनवटा लक्ष्य सक्रिय राख्न सकिन्छ। ५०० ग्राम वा सोभन्दा माथिका बारमा बनाउने शुल्क लाग्ने छैन।

४, आफ्नो सुविधाअनुसार भुक्तानी गर्ने

एक ग्राम चाँदी बराबरको रकम, कुल मूल्यको ५ प्रतिशत वा सम्पूर्ण रकम एकै पटक वा कति र कहिले भुक्तानी गर्ने भन्ने निर्णय ग्राहक स्वयंले गर्न सक्ने छन्।

५, भल्टमा सुरक्षित भण्डारण

सम्पूर्ण भुक्तानी पूरा नहुँदासम्म ग्राहकले छनोट गरेको चाँदी एचबीसीको भल्टमा सुरक्षित राखिने छ।

एप सार्वजनिक गरिएको विशेष अवसरमा भल्ट शुल्क निःशुल्क गरिएको छ। साथै, ग्राहकहरूले एचबीसीमा भण्डारण गरिएका आफ्ना चाँदीका उत्पादनहरू एपमार्फत नै पुनः बिक्री गर्न सक्ने छन्।

६, चाँदी संकलन गर्ने

सम्पूर्ण भुक्तानी पूरा भएपछि ग्राहकहरूले कुनै पनि आइतबारका लागि चाँदी संकलन गर्ने समय बुक गर्न सक्ने छन्।

चाँदी संकलन गरिसकेपछि उक्त उत्पादन एपको ‘योर भल्ट’मा देखिनेछ, जहाँ ग्राहकहरूले आफ्नो चाँदीको वर्तमान मूल्यसमेत हेर्न सक्ने छन्।

चाँदी संकलन गरेको तीन दिनपछि ग्राहकहरूले एचबीसीले प्रकाशित गरेको प्रचलित पुनः खरिद दरमा आफ्नो चाँदी कम्पनीलाई बिक्री गर्न सक्ने छन्।