काठमाडौं । यो साता नेप्से परिसूचक करिब साढे १ प्रतिशत घटेर बन्द भएको छ । गत साता २७२७ दशमलव ३६ विन्दुमा बन्द भएको नेप्से यो साता १.४२ प्रतिशत अर्थात ३८ दशमलव ८३ अंक घटेर २६८८ दशमलव ५३ विन्दुमा बन्द भएको हो ।

साताको अन्तिम कारोबार दिन उच्च अंकले बढ्नु बाहेक यो साता सेयर बजार घटेको थियो । यस साता ५ कारोबार दिनमध्ये ४ कारोबार दिन नेप्से घटेको थियो भने १ कारोबार दिन मात्र बढेको थियो । यस साताको अन्तिम कारोबार दिन नेप्से ७८ अंक बढेर बन्द भएको थियो ।

यो साता सेन्सेटिभ इण्डेक्स २.०३ प्रतिशत घटेको छ भने सेन्सेटिभ फ्लोट इण्डेक्स १.५६ प्रतिशत घटेको छ । नेप्सेसँगै यस साता दैनिक औसत कारोबार रकम पनि घटेको छ । गत साता दैनिक औषतमा ११ अर्ब ९६ करोडको सेयर खरिदबिक्री भएको बजारमा यस साता दैनिक औषतमा ८ अर्ब ३७ करोडको मात्र सेयर खरिदबिक्री भएको छ ।

गत साताको तुलनामा यस साताको दैनिक औषत काराबोर रकम ३०.०३ प्रतिशत घटेको हो । त्यस्तै, यस साता कुल कारोबार संख्या २५.८३ प्रतिशत घटेको छ भने कुल शेयर संख्या २७.९७ प्रतिशत घटेको छ । यस साता नेप्सेको कुल बजार पूँजीकरण पनि करिब साढे १ प्रतिशत घटेको छ । गत साताको अन्तिम कारोबार दिन ४३ खर्ब ३६ अर्ब रुपैयाँ रहेको कुल बजार पूँजीकरण, यस साता ६१ अर्ब घटेर ४२ खर्ब ७४ अर्बमा सीमित भएको छ ।

१३ उपसमूहमध्ये यस साता लगानी उपसमूहबाहेक अरु सबै उपसमूहको परिसूचक घटेको छ । यस साता लगानी उपसमूहको परिसूचक १.०४ प्रतिशत बढेको हो । गत साता १०९ दशमलव ९१ विन्दुमा बन्द भएको यस उपसमूहको परिसूचक, यस साता १ दशमलव १४ अंक बढेर १११ दशमलव ०५ विन्दुमा पुगेको छ ।

कारोबारमा आएको जीवन बीमा उपसमूहको परिसूचक यस साता सर्वाधिक ३.१४ प्रतिशत घटेको छ । गत साता १३५९६ दशमलव ६१ विन्दुमा बन्द भएको यस उपसमूहको परिसूचक, यस साता ४२६ दशमलव ६२ अंक घटेर १३१६९ दशमलव ९९ विन्दुमा झरेको छ ।