Skip to content
Prabhu

६ पटक म्याद थप हुँदा पनि पुल निर्माण भएन

nabil

मुस्ताङ । बेनी–जोमसोम–कोरला सडकअन्तर्गत उपल्लो मुस्ताङको घमी खोला पुल निर्माणमा ढिलाइ भएको छ ।

निर्माण कम्पनीको ढिलासुस्तीका कारण लोघेकर दामोदरकुण्ड गाउँपालिका–२ स्थित घमी खोलामा निर्माणाधीन पुल निर्माण सुरु भएको छ वर्ष बित्दासमेत सम्पन्न हुन नसकेको हो ।

global
अर्घाखाँची सिमेन्ट

उक्त पुल हालसम्म करिब ५० प्रतिशतमात्र निर्माण भएको छ । कोरला सडकअन्तर्गत (जोमसोम–कोरला) ११० किमी दूरीमा पर्ने करिब एक दर्जन पुल सम्पन्न भइसक्दासमेत सुरुआती चरणमा ठेक्का लागेको उक्त पुल निर्माण सम्पन्न हुन सकेको छैन ।

विसं २०७५ पुस १६ गते निर्माण कम्पनी हिमढुङ ठोक्कर इमोटल जेभी कन्स्ट्रक्सनले आयोजनासँग ठेक्का सम्झौता गरेको थियो । सो सम्झौता अनुसार २०७८ साल पुस ९ गते सम्पन्न गर्नुपर्ने थियो ।

आयोजनाले निर्माण कम्पनीलाई पटकपटक ताकेता गरेपनि अटेरी गर्ने गरेको जनाइएको छ । हालसम्म घमी खोला पुलको छ पटक म्याद थप भइसकेको छ । एक स्पानको ४० मिटर लम्बाइ र ड्रेन तथा फुटपाथ गरी ११ मिटर चौडा रहेको पुलको ठेक्का सम्झौता लागत छ करोड ८० लाख रुपैयाँ रहेको छ ।

पुल निर्माणमा ढिलाइ हुँदा जोमसोम हुँदै लोमान्थाङ र कोरला नाका जाने सवारीसाधनलाई बर्खायाममा सास्ती हुने गरेको छ । मुस्ताङको लोघेकर दामोदरकुण्ड गाउँपालिका अध्यक्ष लोप्साङ छोम्फेल विष्टले पुल निर्माणमा निर्माण कम्पनीले चरम ढिलासुस्ती गरेको बताए । उनले विकास निर्माणको कामलाई अवरुद्ध पार्ने निर्माण कम्पनीलाई आवश्यक कारबाही वा ठेक्का सम्झौता रद्द गरेर काम अघि बढाउनुपर्ने बताए ।

‘लामो समयपछि अहिले निर्माणको काम गरेको देखिन्छ, कतिखेर फेरि अलपत्र पार्ने हुन्’, अध्यक्ष विष्टले भने, ‘सबै स्थानका पुल बनेर सवारी गुडिरहँदा घमी खोला पुल सम्पन्न हुन नसक्नु दुर्भाग्य नै हो ।’

निर्माण कम्पनी कार्यस्थलमा फर्किएको बेनी–जोमसोम–कोरला सडकका आयोजना प्रमुख ध्रुव झाले जानकारी दिए । झाका अनुसार पुलको ‘फाउन्डेसन’ र ‘सबस्ट्रक्चर’को काम सम्पन्न भइसकेको छ । अब ढलानका लागि ‘सुपरस्ट्रक्चर’को काम बाँकी रहेको आयोजनाले जनाएको छ ।

यसै सडकअन्तर्गत कागबेनी खोलामा निर्माणाधीन पुल ९५ प्रतिशत भौतिक प्रगति हुँदा विसं २०८० साउन २८ गतेको बाढीले बगाएर क्षति पुर्याएको थियो । उक्त स्थानमा आयोजनाले नयाँ ठेक्का खुलाएको छैन ।

Prabhu
maruti cement
sikhar insurance

प्रतिक्रिया दिनुहोस्

Copyright 2025 © laganinews.com | All rights reserved.

Designed & Maintained by Eservices Nepal