काठमाडौं । अर्थ मन्त्रालयले पुँजी बजारमा देखिएको विसङ्गति तथा समस्या पहिचानको लागि कार्यदल गठन गरेको छ । अर्थ मन्त्रालयले शुक्रबार तत्काल आम लगानीकर्ताको मनोबल वृद्धिका लागि गर्नुपर्ने प्रणालीगत तथा प्रक्रियागत सुधारको ठोस योजनासहित पाँच दिन भित्र सुझाव पेस गर्न निर्देशन दिँदै ४ सदस्य कार्यदल गठन गरेको हो ।
अर्थ मन्त्रालयले नेपाल धितोपत्र बोर्डका कार्यकारी निर्देशक रुपेश केसीको संयोजकत्वमा ३ सदस्य सहितको कार्यदल गठन गरेको छ । कार्यदलमा नेपाल राष्ट्र बैंकका निर्देशक शरण अधिकारी, नेपाल स्टक एक्सचेन्जका कामु कार्यकारी निर्देशक निरञ्जन फुयाँल र अर्थ मन्त्रालयका उपसचिव शरद निरौला रहेका छन् ।
जेनजी आन्दोलनको कारण एक हप्ता बन्द रहेको सेयर बजार बिहीबार खुलेको थियो । बिहीबार खुलेको सेयर बजार कारोबार सुरु भएको केही समय मै ६ प्रतिशतले घटेर बन्द भएको छ । लगानीकर्ता सेयर बजार केही समयको लागि नखोल्न भन्दै माग राखेका थिए । जेनजी आन्दोलनको कारण लगानीकर्ताको मनोबल खस्किएको भन्दै सेयर बजार केही समयको लागि बन्द गर्न लगानीकर्ताको माग थियो ।
प्रतिक्रिया दिनुहोस्