काठमाडौं । पूर्वअर्थमन्त्री सुरेन्द्र पाण्डेले चालु आर्थिक वर्षको बजेटमा केही सकारात्मक व्यवस्था समेटिएको बताएका छन्। नेपाल व्यवस्थापन संघ (म्यान)ले आयोजना गरेको पोस्ट–बजेट कार्यक्रममा बोल्दै उनले ‘थर्ड पार्टी’ बीमाको सीमा ५ लाख रुपैयाँबाट १० लाख रुपैयाँ पुर्याइनु, अपार्टमेन्ट खरिदमा सहुलियत तथा उधारो असुलीसम्बन्धी कानुन ल्याउने घोषणा सकारात्मक कदम भएको बताए।
पाण्डेले मूल्यवृद्धि नियन्त्रणमा सरकारले विशेष ध्यान दिनुपर्ने आवश्यकता औँल्याउँदै विद्युत् बढी खपत गर्नेलाई प्रोत्साहन दिनुपर्नेमा अतिरिक्त कर लगाइनु उपयुक्त नभएको टिप्पणी गरे। उनले कृषि, ऊर्जा, पर्यटन र प्रविधि क्षेत्रमा लगानी बढाउन सके अर्थतन्त्रलाई गति मिल्ने धारणा व्यक्त गरे। कार्यक्रममा अर्का पूर्वअर्थमन्त्री वर्षमान पुन ले सरकारले लिएको आर्थिक वृद्धिदरको लक्ष्य हासिल हुन कठिन रहेको बताए। उनका अनुसार बजेट जनअपेक्षा अनुरूप आउन नसकेको छ।
यसैगरी, सांसद लिमा अधिकारीले पुँजीगत खर्च सुधार, निर्णय प्रक्रियालाई तीनै तहमा प्रभावकारी बनाउने तथा समयमै आयोजना सम्पन्न गर्न ‘सनसेट कानुन’ निर्माणको प्रक्रिया अघि बढाइएको जानकारी दिइन्। उनले वर्तमान सरकार बलियो भएकाले धेरै काम गर्न सक्ने उल्लेख गर्दै निजी क्षेत्र र सबै राजनीतिक दलको सहयोग आवश्यक रहेको बताइन्।
प्रतिक्रिया दिनुहोस्