काठमाडौं । न्यादी हाइड्रोपावर लिमिटेडको नोक्सानी घटेको छ । कम्पनीले सार्वजनि गरेको चालु आर्थिक वर्षको दोस्रो त्रैमासिकसम्मको अपरिष्कृत वित्तीय विवरण अनुसार गत आवको भन्दा नोक्सानी घटेको हो ।

विद्युत बिक्री आम्दानी बढेसँगै कम्पनीको खुद नोक्सानी पनि घटेको हो । समीक्षा अवधिमा कम्पनीको खुद नोक्सानी १० करोड ६४ लाख रुपैयाँबाट घटेर ८६ लाख ५५ हजार रुपैयाँमा पुगेको छ । कम्पनीको वित्तीय खर्च पनि समीक्षा अवधिमा २४ करोड ५२ लाख रुपैयाँबाट घटेर २१ करोड ८५ लाख रुपैयाँमा सीमित भएको छ।

चालु आर्थिक वर्षको पुस मसान्तसम्ममा कम्पनीले विद्युत बिक्रीमार्फत ३६ करोड ४८ लाख रुपैयाँ आम्दानी गरेको छ । यो गत आर्थिक वर्षको सोही अवधिको तुलनामा २७.११ प्रतिशत बढी हो । गत आर्थिक वर्षको सोही अवधिसम्ममा कम्पनीले २८ करोड ७० लाख रुपैयाँ यस्तो आम्दानी गरेको थियो ।

१ अर्ब ५० करोड रुपैयाँ चुक्ता पुँजी रहेको यस कम्पनीको अन्य इक्विटी ५४ करोड ४४ लाख रुपैयाँ ऋणात्मक रहेको छ। पुस मसान्तसम्ममा कम्पनीको प्रतिशेयर आम्दानी ५८ पैसा ऋणात्मक रहेको छ भने प्रतिशेयर नेटवर्थ ७३ रुपैयाँ ७० पैसा रहेको छ ।