काठमाडौं । साताको चौथो कारोबार दिन बुधबार सेयर बजार स्थिर देखिएको छ । आज सेयर बजार मापक नेप्से परिसूचक ०.०४ अंक घटेर २६६२.०९ विन्दुमा बन्द भएको छ। आज सेन्सेटिभ इण्डेक्स ०.८१ अंक बढेको छ भने फ्लोट इण्डेक्स ०.०७ अंक र सेन्सेटिभ फ्लोट इण्डेक्स ०.१८ अंक बढेको छ।

आज सेयर बजार स्थिर भएता पनि कारोबार रकमभने मंगलबारको तुलनामा सामान्य बढेको छ। मंगलबार ८ अर्ब ६१ करोड रुपैयाँबराबरको सेयर खरिदबिक्री भएको बजारमा यस दिन ८ अर्ब ६९ करोड २२ लाख ५० हजार रुपैयाँबराबरको सेयर खरिदबिक्री भएको छ।

आज कारोबारमा आएको १३ उपसमूहमध्ये ५ उपसमूहको परिसूचक बढेको छ भने ८ उपसमूहको परिसूचक घटेको छ। आज सबैभन्दा धेरै रिडी पावर कम्पनीको लगानीकर्ताले कमाएका छन् । यस कम्पनीको सेयरमूल्य यस दिन सर्वाधिक ९.६७ प्रतिशत बढेको हो। यसैगरी, आज सिंगटी हाइड्रो इनर्जीको सेयरमूल्य साढे ८ प्रतिशतभन्दा बढी बढेको छ ।

आज रिडी हाइड्रोपावर कम्पनीको सेयर नै सबैभन्दा धेरै कारोबार भएको छ। यस कम्पनीको आज ६५ करोड ४७ लाख रुपैयाँबराबरको सेयर कारोबार भएको छ।