काठमाडौं । हेटौँडा कपडा उद्योग सञ्चालनमा ल्याउने तयारीसँगै सरकारले कपडा उद्योगका लागि आवश्यक कच्चा पदार्थ कपासको स्वदेशमै उत्पादन बढाउन जोड दिएको छ। उद्योगमन्त्री गौरीकुमारी यादवले कपासको आयात घटाउँदै स्वदेशी उद्योगका लागि आवश्यक कच्चा पदार्थको आपूर्ति सुनिश्चित गर्न निजी क्षेत्र तथा व्यवसायीलाई कपास खेतीमा लगानी गर्न आह्वान गरेकी छन्।

मन्त्री यादवले नेपालमा कपडा उद्योग सञ्चालनका लागि आवश्यक पर्ने कपास ठूलो परिमाणमा विदेशबाट आयात गर्नुपर्ने अवस्थाको अन्त्य गर्न स्वदेशमै व्यावसायिक कपास खेती विस्तार गर्नुपर्ने बताएकी हुन्। उनका अनुसार कपडा उद्योग सञ्चालनसँगै त्यसका लागि आवश्यक कच्चा पदार्थको उत्पादनलाई पनि प्राथमिकतामा राख्न सके मुलुकमा उत्पादनको दिगो शृंखला निर्माण गर्न सकिन्छ।

यसै विषयमा मन्त्री यादवले कृषि मन्त्री गीता चौधरीसँग भेट गरी नेपालमा कपास खेती विस्तार गर्ने सम्भावनाबारे छलफल गरेकी छन्। छलफलका क्रममा कृषि मन्त्री चौधरीले दाङ, बाँके, बर्दियालगायतका जिल्लामा कपास खेतीका लागि उपयुक्त वातावरण रहेको जानकारी गराएकी थिइन्।

नेपालमा कपास खेतीको सम्भावना रहे पनि व्यावसायिक रूपमा ठूलो क्षेत्रफलमा खेती हुन नसक्दा कपडा उद्योगका लागि आवश्यक कच्चा पदार्थमा विदेशी निर्भरता कायमै छ। सरकारले कपास खेतीलाई व्यावसायिक रूपमा विस्तार गर्न सके कपास आयातमा खर्च हुने ठूलो रकम स्वदेशमै रोक्न सकिने र किसानको आम्दानीसमेत बढाउन सकिने अपेक्षा गरिएको छ।

उद्योग विभागका महानिर्देशक जितेन्द्र बस्नेतका अनुसार लामो समयदेखि बन्द रहेको बुटवल धागो कारखाना पुनः सञ्चालन गर्ने प्रक्रिया पनि अघि बढेको छ। कारखाना सञ्चालनका लागि आवश्यक सम्पत्ति तथा दायित्वको मूल्यांकन गर्ने कार्य अन्तिम चरणमा पुगेको उनले जानकारी दिए।

हेटौँडा कपडा उद्योग पुनः सञ्चालनमा आएपछि त्यसका लागि आवश्यक कच्चा पदार्थ स्वदेशमै उत्पादन गर्ने तथा बुटवल धागो कारखानालाई समेत सञ्चालनमा ल्याउने तयारीले नेपालमा कपासदेखि धागो र धागोदेखि कपडासम्मको उत्पादन शृंखला विकास गर्ने सम्भावना बढेको छ।

सरकारले कपडा उद्योगलाई आवश्यक पर्ने कच्चा पदार्थ स्वदेशमै उत्पादन गर्न निजी क्षेत्रलाई प्रोत्साहन गर्ने नीति अघि सारेको छ। कपास खेतीको विस्तारसँगै किसान, उद्योग र निजी क्षेत्रलाई एउटै उत्पादन शृंखलामा जोड्न सके रोजगारी सिर्जना, आयात प्रतिस्थापन र स्वदेशी उत्पादन वृद्धि गर्न सहयोग पुग्ने सरकारको अपेक्षा छ।

मन्त्री यादवले स्वदेशी उद्योगलाई आवश्यक पर्ने कच्चा पदार्थ नेपालमै उत्पादन गर्न निजी क्षेत्रको लगानी आवश्यक रहेको बताउँदै आएकी छन्। कपास खेती विस्तार गरी विदेशी कपासको आयात घटाउने, स्वदेशी कच्चा पदार्थको उपलब्धता बढाउने र कृषि तथा औद्योगिक क्षेत्रमा रोजगारीका अवसर सिर्जना गर्ने सरकारको लक्ष्य रहेको बताइएको छ।

हेटौँडा कपडा उद्योग र बुटवल धागो कारखानाको पुनः सञ्चालनसँगै कपास खेतीलाई समेत व्यावसायिक रूपमा विस्तार गर्न सके नेपालमा कपडा उद्योगको उत्पादन लागत घटाउनुका साथै कृषि र उद्योगबीचको सम्बन्ध थप मजबुत बनाउन सकिने देखिएको छ। त्यसका लागि सरकारले किसानलाई प्रोत्साहन, निजी क्षेत्रलाई लगानीको वातावरण र उद्योगलाई आवश्यक कच्चा पदार्थको सुनिश्चितता गर्नुपर्ने आवश्यकता देखिएको छ।